اسلام آباد (عکس آن لائن ) وزیر خارجہ مخدوم شاہ محمود قریشی نے کہا ہے کہ بھارتی غیر قانونی مقبوضہ کشمیر میں بھارت نے محرم الحرام میں ظلم و تشدد کا وہ منظر پیش کیا ، جس کی مثال نہیں ملتی ، پوری امت مسلمہ میں بھارتی رویے پر شدید غم و غصہ پایا جاتا ہے۔عالمی میڈیا اور تنظیموں کو بھارتی مظالم کے خلاف مشترکہ آواز اٹھانی چاہیے۔
یکم ستمبر 2020 کو مقبوضہ کشمیر کی صورتحال کے حوالے سے ایک بیان میں وزیر خارجہ نے کہا کہ مقبوضہ جموں و کشمیر میں، مذہبی رواداری کی جھوٹی دعویدار، بھارت سرکار نے ظلم و ستم کی انتہا کر دی۔پہلے تو عزاداری کے جلوسوں کو نکلنے کی اجازت نہیں دی گئی بعد ازاں ان جلوسوں کے شرکا کو تشدد کا نشانہ بنایا گیا گرفتاریاں کی گئیں ۔
۔وزیر خارجہ نے کہا کہ میں اس موقع پر پاکستان کے تمام شہریوں کا، علما کا اور ان تمام مکاتب فکر کا شکریہ ادا کرنا چاہوں گا جنہوں نے محرم الحرام کے دوران یکجہتی، رواداری اور وضع داری کا ثبوت دیا جس کے باعث تمام پروگرامز بخیر و عافیت سرانجام پائے اور شرانگیز قوتوں کو اپنے مقاصد کے حصول میں ناکامی ہوئی۔
بھارت میں آج کورونا وبا تیزی سے پھیل رہی ہے حیرت کی بات یہ ہے کہ مقبوضہ کشمیر میں کورونا وبا کے دوران بھی بھارتی مظالم جاری رہے
چین جانتا ہے کہ دنیا حقائق سے پوری طرح آشنا ہے چین کو اپنے نکتہ نظر اور اپنی فورسز پر اعتماد ہے۔بھارت کے دعووں میں کوئی دم خم نہیں ہے بھارت نے پہلے بھی چین کے ساتھ پنجہ آزمائی کی اور اپنے فوجیوں کی لاشیں چھوڑ کر بھاگے۔پاکستان بھارتی غیر قانونی مقبوضہ جموں و کشمیر میں جاری انسانی حقوق کی خلاف ورزیوں کو ہر فورم پر موثر انداز میں اٹھا رہا ہے۔
