اسلام آباد (عکس آن لائن)صدر مملکت عارف علوی نے بھارتی قید میں وفات پاجانے والے حریت رہنما محمد اشرف صحرائی کی وفات پر گہرے دکھ اور صدمے کا اظہار کیا ہے ۔
اپنے بیان میں صدر مملکت نے کہاکہ مرحوم نے کشمیر کے حق خود ارادیت کی جدوجہد میں گراں قدر خدمات سرانجام دیں، بھارت حریت قیادت کو قید میں رکھ کر آزادی کے جذبے کو دبا نہیں سکتا۔ صدر مملکت نے کہاکہ بھارت کی ریاستی دہشت گردی اور ظالمانہ ہتھکنڈوں کے خلاف ان کی جدوجہد کو یاد رکھا جائے گا، صدر مملکت نے جدوجہدِ آزادی کشمیر کیلئے مرحوم کی خدمات کو زبردست خراجِ تحسین پیش کیا ۔
صدر مملکت نے کہاکہ بھارت قید حریت قیادت اور بے گناہ کشمیریوں کو فی الفور رہا کرے، اقوام ِ متحدہ اور بین الاقوامی قیادت کشمیر میں انسانی حقوق کی سنگین خلاف ورزیوں کا نوٹس لے۔ صدر مملکت نے کہاکہ بین الاقوامی برادری کشمیر کے متعلق اپنے وعدوں اور ذمہ داریوں کو پورا کرے۔صدرمملکت نے مرحوم کی درجات کی بلندی اور اہلِ خانہ کیلئے صبرِ جمیل کی دعا کی
