لاہور (عکس آن لائن) نگران وزیر اعلیٰ پنجاب محسن نقوی سے لاہور میں مصنوعی بارش کرنے والی متحدہ عرب امارات کے محکمہ موسمیات کی کلاڈ سیڈنگ ٹیم کے سربراہ احمد الکمال کی سربراہی میں وفد نے ملاقات کی ۔ وزیراعلی سے ملاقات کرنے والوں میں چیف پائلٹ مائیکل اینسٹس اورپائلٹ کرنل عبید شامل تھے۔
وزیر اعلی محسن نقوی نے سموگ میں کمی کے لئے مصنوعی بارش برسانے والے یو اے ای کی ٹیم کی کاوشوں کو سراہا اوران کا شکریہ ادا کیا۔ محسن نقوی نے کہا کہ پاکستان میں پہلی بار مصنوعی بارش کا لاہور میں کامیاب تجربہ کیا گیااورایئر کوالٹی لیول کئی روز 200سے نیچے رہا، امید ہے کہ جنوری میں مناسب بادل آتے ہی دوبارہ مصنوعی بارش برسائی جائے گی۔انہوں نے کہا کہ پاکستان میں پہلی بارمصنوعی بارش برسا کریواے ای کی ٹیم کا نام تاریخ کا حصہ بن چکا ہے،پاکستانی قوم متحدہ عرب امارات کے پائلٹس کی اس کاوش کو فراموش نہیں کرسکتے، مصنوعی بارش برسانے کے حوالے سے متحدہ عرب امارات کی قیادت کے بے پایاں تعاون کے شکرگزار ہیں۔
ماہرین نے گفتگو کرتے ہوئے کہا کہ امید ہے کہ جنوری میں مطلوبہ بادل آتے ہی مصنوعی بارش برسانے کا دوسرا تجربہ کیا جائے گا۔متحدہ عرب امارات کی ٹیم کے سربراہ احمد الکمال اور وفد کے دیگر ارکان نے شاندار مہمان نوازی پر وزیراعلی پنجاب محسن نقوی کا شکریہ ادا کیا۔ پائلٹس نے کہا کہ لاہور میں بہت پیار ملا،پاکستان ہمارا دوسر اگھر ہے۔
صوبائی وزرا عامر میر،بلال افضل،مصنوعی بارش کے ماہر بریگیڈیئر ندیم،ڈی جی انوائرمنٹ پروٹیکشن اتھارٹی،چیف میٹرولوجسٹ چودھری محمد اسلم،سیکرٹری وزیراعلی، سینئر جوائنٹ ڈائریکٹر پاکستان سول ایوی ایشن اتھارٹی محمد الطاف اور دیگر حکام بھی اس موقع پر موجود تھے۔
