لاہور (عکس آن لائن) معروف سینئر اداکار عرفان کھوسٹ نے کہا ہے کہ شوبز کی دنیا میں کتنا کام کرچکا اب یاد نہیں ہے۔ خصوصی بات چیت میں عرفان کھوسٹ نے کہا کہ پچھلی پانچ دہائیوں سے کوئی وقت ایسا نہیں گزرا کہ جب میں فارغ بیٹھا ہوں ،
نوجوانی کے ایام سے لیکر اب تک ریڈیو ، ٹی وی ، اسٹیج اور فلموں میں اتنا کام کر چکا ہوں کہ اب مجھے انکی تعداد بھی یاد نہیں۔ انہوں نے کہا کہ مجھ سے قبل میرے والد سلطان کھوسٹ نے اپنا سکہ منوایا اور بعد میں مجھے اس شعبے میں آنے کا موقع ملا تو میں انہی کی روایات کو لیکر آگے بڑھا۔آج میرے خاندان کی چوتھی نسل بھی شوبز انڈسٹری میں داخل ہو چکی ہے جو میرے لیے اعزاز ہے۔ انہوں نے کہا کہ میں نے اپنے بچوں پر کبھی اپنی مرضی مسلط کرنے کی کوشش نہیں کی لیکن میرا بیٹا سرمد کھوسٹ اب اس وراثت کو آگے لے کر چل رہا ہے۔
