کراچی (عکس آن لائن)سندھ ہائی کورٹ نے کراچی شہر میں ہیوی ٹریفک کے داخلے سے متعلق درخواست پر تحریری حکم نامہ جاری کردیا۔ عدالت عالیہ نے تحریری حکم نامے میں کہا ہے کہ غیر قانونی ہوٹرز اور سائرن استعمال کرنے والوں کو سات دن میں ہٹانے کی ہدایت کی جائے۔ عدالت نے چیف سیکرٹری سے ہیوی ٹریفک سے متعلق عدالتی حکم پر عملدرآمد کی رپورٹ طلب کرلی۔ عدالت نے آئندہ سماعت پر چیف سیکریٹری سندھ کو ذاتی حیثیت میں طلب کرلیا۔ تحریری حکم نامے کے مطابق بس اونرز ایسوسی ایشن، این ایچ اے اور ٹریفک انجینئرنگ کو فریق بنانے کی درخواست منظور کرتے ہوئے فریقین کو نوٹس جاری کردیئے۔
عدالت نے 25 جنوری ڈی آئی جی ٹریفک کو بھی پیش ہونے کا حکم دے دیا۔ تحریری حکم نامے میں کہا گیا کہ ڈی آئی جی ٹریفک نے رپورٹ پیش کی جس مین بتایا گیا کہ شہر کے داخلی اور خارجی راستوں پر چیک پوسٹ قائم کردیئے گئے ہیں۔ صبح 6 سے رات 11 بجے تک ہیوی ٹریفک کو شہر میں داخل ہونے سے روکا جارہا ہے۔ سپریم کورٹ کے فیصلے پر عملدرآمد سے حادثات کی شرح میں کمی واقع ہوئی ہے۔ مستثنی ہیوی گاڑیاں اب بھی شہر میں داخل ہوتی ہیں۔ ٹریفک پولیس کالے شیشوں، پریشر ہارن اور فینسی نمبرز پلیٹس کیخلاف بھی کارروائی کررہی ہے۔ ڈی آئی جی ٹریفک نے اپنی رپورٹ میں اعتراف کیا ہے کہ کالے شیشوں، فینسی نمبرز پلیٹس اور پریشر ہارن بجانے کا سلسلہ اب بھی جاری ہے۔ عدالت نے ہوٹرز، سائرن کی اجازت رکھنے والوں کی فہرست طلب کرلی۔ عدالت نے پریشر ہارن، کالے شیشے، فینسی نمبرز پلیٹس ہٹانے کے لیے اخبارات اشتہار شائع کرنے کا حکم دیدیا۔
