اسلام آ باد (نمائندہ عکس) عوامی مسلم لیگ کے سربراہ شیخ رشید احمد نے کہا ہے کہ آصف زرداری خریدوفروخت کی منڈی لگاتا ہے، جہاں ووٹ خر یدو فروخت ہو رہی ہوسمجھ جائیں آصف زرداری موجود ہے،اکتوبر نومبر میں عام انتخابات کے سوا کوئی حل نہیں۔اوور سیز پاکستانیوں کو ووٹ کا حق دلانے سے متعلق درخواست دائر کرنے کے بعد سپریم کورٹ کے باہر میڈیا سے گفتگو کرتے ہوئے شیخ رشید نے کہا دوسرے پاکستانیوں کی طرح اوورسیز پاکستانیوں کا بھی ووٹ ڈالنے کا بنیادی حق ہے، موجودہ حکومت اس معاملے پر تاخیری حربے استعمال کررہی، ہم اوورسیز پاکستانیوں کو ووٹ کا حق دلانے آئے ہیں ۔
انہوں نے کہا کہ تحریک انصاف عمران خان کا نام ہے۔ تحریک انصاف میں باقی کوئی میٹر نہیں کرتا، جہاں عمران خان ہوگا ہم اس کے ساتھ ہوں گے،پرویز الہی تحریک انصاف کے نامزامیدوارہیں، جہاں ووٹوں کی خریدو فروخت ہو، سمجھیں آصف زرداری پیچھے ہے۔ آصف زرداری خریدوفروخت کی منڈی لگاتا ہے ۔ جہاں ووٹ خریدا اورفروخت ہو رہا ہوسمجھ جائیں آصف زرداری موجود ہے۔ شیخ رشید کا کہنا تھا کہ نیب ترامیم پر درخواست دائر کرنا چاہتے تھے، بیرسٹر سرجیل سواتی کے ذریعے درخواست دائر کردی ہے ۔
پرسوں پرویز الہی وزیراعلی کا حلف اٹھائیں گے ۔ انہوں نے کہا کہ لاہور جا رہا ہوں، وہاں چودھری شجاعت حسین سے بات کروں گا، ق لیگ کے پرانے تعلقات ہیں ۔ قبل ازیں سماجی رابطوں کی ویب سائٹ ٹوئٹر پر جاری بیان میں عوامی مسلم لیگ کے سربراہ نے کہا ہے کہ سیاسی عدم استحکام معاشی قیامت کو جنم دے رہا ہے۔ ڈالر 226 روپے کا ہونے کے باوجود آئی ایم ایف کے ساتھ ابھی بھی بیل آٹ معاہدہ طے نہیں پایا۔اکتوبر نومبر میں عام انتخابات کے سوا کوئی حل نہیں۔ پھر کوئی بھی حکومت نہیں کر پائے گا۔
