پریٹوریا(عکس آن لائن)جنوبی افریقہ نے عالمی عدالت انصاف سے اسرائیل کے خلاف مزید اقدامات کا مطالبہ کردیا ہے۔غیرملکی خبررساں ادارے کے مطابق ذرائع نے بتایا کہ جنوبی افریقہ کی وزیر خارجہ نالیدی پیندور نے ایک بار پھر عالمی عدالت انصاف سے اسرائیلی جارحیت اور مظالم پر اسرائیل کے خلاف جنگی جرائم پر سزا دینے کا مطالبے پر زور دیا ۔پہلی عالمی اینٹی اپارٹ ہیلڈ کانفرنس سے خطاب میں جنوبی افریقہ کی وزیر خارجہ کا کہنا تھا کہ فلسطین کی صورتحال کو عالمی عدالت انصاف کی جانب سے پہلی ترجیح دینی چاہیے اور جنگی جرائم کے مرتکب کو سزا دینی چاہیے۔
3 روزہ کانفرنس میں اسرائیلی جارحیت اور مظالم پر بھی بات چیت کی گئی ہے، جبکہ فلسطین اور غزہ میں اسرائیلی درندگی کو پر اثر انداز میں دکھایا گیا ہے۔وزیر خارجہ کا کہنا تھا کہ جنوبی افریقہ ہمیشہ سے جنگی جرائم کے خاتمے کے لیے کوشاں رہا ہے، جبکہ جنوبی افریقہ انسانیت کے خلاف جرائم اور قتل عام کے خلاف ہے۔جنوبی افریقہ کا کانفرنس میں مزید کہنا تھا کہ عدالت اسرائیل کے خلاف اضافی ہنگامی اقدامات کا حکم جاری کرے۔
اسرائیل کے حملوں میں اضافہ ہوگیا ہے جس سے غزہ میں امداد کی ترسیل کو خطرات لاحق ہوگئے ہیں، اسرائیلی حملے فلسطینی عوام کے حقوق کو ناقابل تلافی نقصان پہنچا رہے ہیں۔جنوبی افریقہ نے جنوری میں اسرائیل کے خلاف عالمی عدالت انصاف میں درخواست دی تھی جس پر عدالت نے اسرائیل کو فلسطینیوں کی نسل کشی روکنے کا حکم دیا تھا۔
