لاہور(عکس آن لائن)ترجمان پنجاب حکومت مسرت جمشید چیمہ نے کہا ہے کہ اپوزیشن اتحاد ‘ ‘ کرپشن اور لیڈربچائو ”تحریک چلاتے چلاتے تھک جائے گا لیکن اسے کامیابی نہیں ملے گی،
اپوزیشن ملک وقوم کودرپیش مشکلات کیلئے نہیں ”نظریہ کرپشن” کے تحت اکٹھی ہوئی ہے ۔مقامی ہوٹل میں منعقدہ تقریب میں شرکت کے موقع پر میڈیا نمائندوں سے گفتگو کرتے ہوئے انہوں نے کہا کہ آج اپوزیشن کو کرپشن کیسزمیںریلیف مل جائے تویہ ایسے فرینڈلی ہو جائیں گے کہ جیسے انہیں کبھی حکومت سے کوئی شکایت تھی ہی نہیں ۔پاکستان اس وقت ”اب نہیں توکبھی نہیں ”والی صورتحال سے دوچار ہے ،اگر آج کرپشن کے ناسور کو جڑ سے اکھاڑنہ پھینکاگیا توملک کبھی بھی درست سمت میںگامزن نہیں ہو سکے گا ۔
وزیر اعظم عمران ہرگزمصلحت پسندی کا شکارنہیں ہوں گے بلکہ وہ پر عزم ہیں کہ کسی بھی طرح کی قربانی دینی پڑے لیکن کرپشن کرنے والوںکوچھوٹ نہیں ملے گی ۔ انہوں نے کہا کہ مسلم لیگ (ن) اپنے دور کے چھوڑے گئے مہنگے قرضوں کا کیوں ذکرنہیں کرتی ،معیشت کو کس حال میں چھوڑ کرگئے اس پر بھی لب کشائی نہیں کرتے بلکہ ان کاسارازورجھوٹے اورگمراہ کن پراپیگنڈے پر ہے جسے عوام مستردکرچکے ہیں۔
