لاہور(نمائندہ عکس)مسلم لیگ (ن)کے صدر اور پارلیمنٹ میں قائد حزب اختلاف شہبازشریف نےکہا ہے پارلیمنٹ میں حکومتی ارکان پیکا کیخلاف ووٹ دیں گے۔ نجی ٹی وی کے مطابق ہفتہ کو ایسوسی ایشن آف الیکڑانک میڈیا ایڈیٹز اینڈ نیوز ڈائریکٹرز (ایمینڈ)کے نومنتخب عہدیداروں سے ملاقات میں مبارک دیتے ہوئے شہبازشریف نے کہا کہ آپ نے قیادت ایسے مرحلے پر سنبھالی ہے جب صحافت اور اظہار رائے کی آزادی پر کاری حملے ہورہے ہیں، آئین میں دی گئی آزادیوں پر سیاہ قوانین کے ذریعے شب خون مارا جارہا ہے۔
شہباز شریفنے کہاکہ دستور میں دی گئی صحافت، اظہار رائے اور شہری آزادیوں کے تحفظ اور فروغ کی جدوجہد میں آپ کے ساتھ ہیں، صحافت اور سیاست جمہوری نظام کی بقائ، فروغ اور تحفظ میں ہمیشہ ساتھ ساتھ رہے ہیں، صحافت اور سیاست دونوں کے بغیر کسی ایک کی آزادی قائم نہیں رہ سکتی۔اپوزیشن لیڈر نے کہا کہ ہم پیکا کالے قانون کو مسترد کرچکے ہیں، آرڈیننس کی پارلیمنٹ سے منسوخی کے لئے قرارداد جمع کرادی ہے، امید ہے کہ حکومت کے اتحادی اور باضمیر حکومتی ارکان بھی پیکا آرڈیننس کی منسوخی کے لئے قرارداد کے حق میں ووٹ دیں گے۔
