اسلام آباد (عکس آن لائن) وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ آزاد کشمیر اور بلوچستان میں برفباری سے حادثات پر ہلاکتوں پر بے حد رنج و غم ہے، آزمائش کی اس گھڑی میں ہم سب اپنے ہم وطنوں کے ساتھ ہیں،
آزاد جموں کشمیر میں برفانی تودا گرنے کے بعد کی صورتحال کا وزیراعظم نے فوری نوٹس لیتے ہوئے فوری امدادی اقدامات کی ہدایت کی۔ سماجی رابطے کی ویب سائٹ ٹوئٹر پر اپنے بیان میں ڈاکٹر فردوس عاشق اعوان نے کہا وزیر اعظم نے متعلقہ اداروں کو ہنگامی بنیادوں پر مشکلات سے دوچار شہریوں اور متاثرین کی بھرپور امداد کے احکامات دیئے،وزیراعظم نے متاثرہ افراد کو محفوظ مقامات پر منتقل کرنے سمیت زخمیوں کے بھرپور علاج معالجے کیلئے ہدایات دیں،آزاد جموں و کشمیر حکومت اور متعلقہ محکموں کے اشتراک عمل سے متاثرہ خاندانوں اور شہریوں کی مدد کیلئے تمام وسائل اور صلاحیتیں بروئے کار لائیں گے۔
