پٹرول مہنگا نہیں کرسکتے،حکومت کا آئی ایم ایف سے مزید وقت لینے کا فیصلہ

اسلام آباد (نمائندہ عکس ) وزیر خزانہ مفتاح اسماعیل نے کہا ہے اس وقت قوم پٹرول کی قیمتوں میں اضافے کی متحمل نہیں ہوسکتی، عمران خان اور شوکت ترین نے آئی ایم ایف سے پٹرول مہنگا کرنے کامعاہدہ کیا۔ صحافیوں سے گفتگو کرتے ہوئے مفتاح اسماعیل نے کہا کہ ماضی کی حکومت ہر جگہ بارودی سرنگیں بچھا کر گئی ، شوکت ترین کے دعوں پر ہنسی آتی ہے، بتائیں کہاں پیسے چھوڑ کر گئے،پٹرولیم مصنوعات پر سبسڈی سے نقصان ہورہا ہے ۔

وزیر خزانہ کا مزید کہنا تھا کہ عمران خان کی وجہ سے آج ملک میں ایندھن کی کمی ہے، انہوں نے سی پیک معاہدے کو بھی نقصان پہنچایا، یہ دھرنا دھرنا کھیل کراپنی سیاست کو چمکا رہے ہیں۔ انہوں نے کہا کہ عمران خان نے جہانگیر ترین اور علیم خان سے بے وفائی کی، اسٹیٹ بینک کی شرح سود بھی بڑھانی پڑے گی، عمران خان نے 21 ارب ڈالر قرضے لئے جو واپس کرنے ہیں۔