پشاور (عکس آن لائن)وزیرِ اعلی خیبر پختون خوا علی امین گنڈاپور نے پاکستان میں کرغزستان کے سفیر کو خط لکھا ہے جس میں پاکستانی طلبہ کی حفاظت کے موثر اقدامات پر کرغزستان حکومت سے اظہارِ تشکر کیا ہے۔خط میں وزیرِ اعلی خیبر پختون خوا علی امین گنڈاپور نے کہا ہے کہ واقعے پر فوری ردِ عمل اور صورتِ حال سے نمٹنے کے لیے جامع اقدامات قابلِ تعریف ہیں، فوری اقدام نے مزید نقصان کو روکا اور پریشان والدین کو یقین دہانی فراہم کی۔انہوں نے کرغزستان کے سفیر کو خط میں کہا ہے کہ مستقل رابطوں نے خدشات کو دور کرنے میں مدد کی، یہ جان کر تسلی ہوئی کہ ہمارے طلبہ محفوظ ہاتھوں میں ہیں۔
وزیرِ اعلی خیبر پختون خوا نے خط میں کہا کہ طلبہ کے تحفظ کو یقینی بنانے کے لیے جاری کوششوں کے مشکور ہیں، واقعہ طلبہ اور ان کے خاندانوں کے لیے کافی پریشانی کا باعث بنا، کے پی حکومت طلبہ کی بحفاظت واپسی کے اخراجات برداشت کرنے کے لیے پرعزم ہے۔خط میں وزیرِ اعلی خیبر پختون خوا علی امین گنڈاپور نے یہ بھی لکھا ہے کہ طلبہ کی فلاح و بہبود مشترکہ ذمے داری ہے، یقین ہے کہ طلبہ کی پاکستان میں محفوظ اور بر وقت واپسی کو یقینی بنایا جائے گا۔
