اسلام آباد (عکس آن لائن)وزیراعظم شہباز شریف نے سیلاب زدہ علاقوں میں ریسکیو، ریلیف اور بحالی کے اقدامات کی چوبیس گھنٹے مانیٹرنگ کرنے اورسیلاب متاثرین کی امداد اور رقوم کی تقسیم کے بارے میں ہر اڑتالیس گھنٹے بعد پیش رفت سے متعلق رپورٹ دینے کی ہدایت کی ہے ۔ جاری اعلامیہ کے مطابق وزیراعظم نے متعلقہ حکام کو بلوچستان میں خاص طور پر بولان، کوئٹہ، ڑوب، دکی، خضدار، کوہلو، کیچ، مستونگ، ہرنائی، قلعہ سیف اللہ اور سبی جیسے علاقوں میں امدادی رقوم کی تقسیم کا عمل تیز کر نے کی ہدایت کی ۔وزیر اعظم نے ہدایت کی کہ سندھ، خیبرپختونخوا اور پنجاب کے متاثرین کی امداد کا عمل مربوط، موثر اور تیز بنایا جائے۔ انہوںنے کہاکہ سیلاب متاثرین ہم سب کی طرف دیکھ رہے ہیں، کوتاہی برداشت نہیں کروں گا۔
وزیر اعظم نے ہدایت کی کہ متاثرین کو خوراک، ادویات اور رہائش کی سہولیات یقینی بنائیں۔وزیراعظم نے یکساں انداز میں ملک بھر میں سیلاب متاثرین کی بھرپور مدد کرنے کی ہدایت کی ۔وزیراعظم نے ہدایت کی کہ سیلاب زدہ علاقوں میں صفائی، بروقت سپرے کے انتظامات کئے جائیں تاکہ ڈینگی اور دیگر وباؤں سے بچا جاسکے۔وزیر اعظم نے کہاکہ متاثرین کو پینے کے پانی کی فراہمی کیلئے مؤثر اقدامات کریں تاکہ لوگوں کو پیٹ کے امراض سے بچایا جاسکے۔ وزیر اعظم کو متعلقہ حکام نے رپورٹ دی کہ بلوچستان کے متعلقہ علاقوں میں خوراک، میڈیکل کیمپ اور شیلٹر کا بندوبست کر دیا گیا ہے۔ وزیر اعظم کو حکام نے رپورٹ دی کہ بلوچستان کی صوبائی حکومت کے تعاون سے متاثرہ علاقوں میں امدادی کاموں۔یں تیزی لائی گئی ہے۔ وزیر اعظم کو رپورٹ دی گئی کہ دیگر صوبوں کی حکومتوں کے تعاون سے اقدامات کئے جا رہے ہیں۔
