واشنگٹن(عکس آن لائن)امریکی وزیر خارجہ مائیک پومپیو نے ایرانی رہبر اعلی علی خامنہ ای پر الزام عائد کیا ہے کہ وہ ذمے داری قبول کرنے کے بجائے عوام سے مسلسل جھوٹ بول رہے ہیں۔
پومپیو کے مطابق حالیہ انتخابات کے بعد جس میں عوام کی ادنی ترین شرکت ریکارڈ کی گئی ، ایرانی حکمراں نظام اپنی قانونی حیثیت کھو چکا ہے۔جمعرات کے روز امریکی وزیر خارجہ نے اپنی سلسلہ وار ٹویٹس میں کہا کہ علی خامنہ ای نے یوکرین کے مسافر طیارے میں شہریوں کی ہلاکت اور ایرانیوں کی صحت کو درپیش اندرون ملک خطرات کی ذمے داری قبول کرنے کے بجائے مسلسل جھوٹ کا سہارا لے رکھا ہے۔پومپیو کا اشارہ ایرانی حکام کی جانب سے کرونا وائرس کے پھیلا پر پردہ ڈالنے کی جانب تھا۔پومپیو کے نزدیک رہبر اعلی اپنی “انقلابی توسیع” کی خاطر ایرانی نوجوانوں کو انتہائی بے رحمی سے قربان کر رہے ہیں ،،، خواہ وہ عراق ، شام یا لبنان میں ہوں۔
