مقبوضہ بیت المقدس (عکس آن لائن)اسرائیل نے مسجد اقصیٰ کی تاریخی دیوار کی توڑپھوڑ شروع کر دی۔القدس کی اسلامی اوقاف اور مسجد اقصیٰ کے امور کے ذمہ دار ادارے کی طرف سے جاری کردہ ایک بیان میں خبردار کیا گیا ہے کہ اسرائیل نے مرمت کی آڑمیں مسجد اقصی کی جنوبی دیوار جسے ‘الختنیہ دیوار’ بھی کہا جاتا ہے کہ مرمت کی آڑ میں توڑپھوڑ شروع کی ہے۔
یہ دیواراموی محلات کی تعمیر کے دور میں تعمیر کی گئی تھی۔فلسطینی اوقاف کی طرف سے جاری کردہ بیان میں کہا گیا ہے کہ اسرائیلی فوج اور پولیس کی فول پروف سیکیورٹی میں تعمیراتی عملے کے ارکان کو مسجد کی تاریخی دیوارپر کام کر تے دیکھا گیا ہے۔فلسطینی اوقاف نے اسرائیلی ریاست سے مطالبہ کیا گیا ہے کہ مسجد اقصیٰ کی دیواروں کی توڑپھوڑ سے باز رہے اور تاریخی دیوار کی توڑپھوڑ کے حوالے سے جاری تمام سرگرمیاں معطل کی جائیں۔محکمہ اوقاف کا کہنا ہے کہ صہیونی حکام دیوار کی مرمت کی آڑ میں اس میں لگے قیمتی پتھر نکالنے اور مسجد اقصی کے تاریخی حصے کو نقصان پہنچانے کی منظم کوشش کررہے ہیں۔
بیان میں واضح کیا گیا ہے کہ مسجد اقصی کا 11دونم کا علاقہ صرف اور صرف مسلمانوں کی ملکیت ہے جس پرکسی دوسری قوم، مذہب یا غیرمسلم طبقے کا کوئی حق نہیں۔بیان میں مسجد اقصیٰ کے ارد گرد جاری کھدائیوں کو مسلمانوں کے قبلہ اول کو دانستہ طور نقصان پہنچانے اور یہودی شرپسندوں کے مذموم عزائم کو پایہ تکمیل تک پہنچاتے ہوئے وہاں پر مزعومہ ہیکل سلیمانی کی تعمیر کی راہ ہموار کرنا ہے۔
