لاہور( عکس آن لائن)معروف اداکارہ کرن اشفاق نے مداح کی ساتھ کافی پینے کی فرمائش پر دلچسپ جواب دیا ہے۔
فوٹو اور ویڈیو شیئرنگ ایپ انسٹاگرام پر کرن اشفاق نے مداحوں کے ساتھ سوالات اور جوابات کا سیشن اور مداحوں کی جانب سے پوچھے گئے سوالات کے دلچسپ جوابات دئیے۔
اسی دوران ایک مداح نے ان کے ساتھ کافی پینے کی فرمائش کردی۔جس پر کرن اشفاق نے کہا کہ ان کے شوہر جم جاتے ہیں، شوہر نے اچھی خاصی باڈی بنا رکھی ہے، کرن نے صارف کو مخاطب کرتے ہوئے کہا کہ مجھے کافی کی پیشکش کرنے سے قبل میرے شوہر کا انسٹاگرام اکائونٹ دیکھ لیں، وہ آپ کی ایسی حالت بنائیں گے کہ آپ یاد رکھیں گے۔
کرن اشفاق نے بتایا کہ شوہر وکالت کرتے ہیں اور وکالت سے متعلق ہی ان کی تعلیم جاری ہے۔ایک سوال کے جواب میں کرن اشفاق نے بتایا کہ وہ اپنے شوہر کی مدد اور تعاون سے ہی اپنے بیٹے روہم کے ساتھ اچھا وقت گزار رہی ہیں۔
کرن اشفاق نے شوہر کی تعریف کرتے ہوئے کہا کہ جن مردوں کی اچھی تربیت ہوتی ہے اور وہ جن سے سچا پیار کرتے ہیں، وہ ان سے اپنی جان کے ٹکڑے الگ نہیں کرتے۔
کرن اشفاق اداکار عمران اشرف کی سابقہ اہلیہ ہیں ان کے ہاں 2020 میں بیٹے روہم کی پیدائش ہوئی جبکہ 2022 میں ان کی طلاق ہوگئی۔اداکارہ نے دسمبر 2023 میں حمزہ علی چوہدری سے دوسری شادی کی تھی۔
