لاہور (عکس آن لائن) پاکستان تحریک انصاف کے رہنما شاہ محمود قریشی کی 9مئی کے جلائو گھیرائو کیس میں عبوری ضمانت میں توسیع کر دی گئی۔انسداد دہشت گردی عدالت لاہور میں مسلم لیگ (ن) کا آفس جلانے، کلمہ چوک پر کنٹینر جلانے اور دیگر مقدمات میں پی ٹی آئی رہنما شاہ محمود قریشی کی عبوری ضمانت کی درخواستوں پر سماعت ہوئی۔
انسداد دہشت گردی عدالت کے جج ارشد جاوید نے پانچ ضمانت کی درخواستوں پر سماعت کی جبکہ دو مقدمات کی سماعت ایڈمن جج منظر علی گل کی عدالت میں ہوئی۔عدالت میں شاہ محمود قریشی کے جیل وارنٹ پیپرز پیش کیے گئے جس کے بعد عدالت نے ان کی عبوری ضمانت میں 31اکتوبر تک توسیع کر دی، عدالت نے آئندہ سماعت پر وکلا سے دلائل طلب کر لیے۔
جناح ہائوس حملہ اور عسکری ٹاور حملہ کیس میں شاہ محمود قریشی کی عبوری ضمانتوں میں 6اکتوبر تک توسیع دی گئی ہے، لاہور ہائی کورٹ کے حکم پر شاہ محمود قریشی کی عبوری ضمانتیں بحال کی گئی تھیں۔
٭٭٭٭٭
