اسلام آباد (عکس آن لائن) ماہرین صحت نے بدلتے موسم میں لوگوں کو احتیاطی تدابیر اختیار کرنے کا مشورہ دیا ہے۔ ماہرین صحت کے مطابق اکتوبر میں موسم کی تبدیلی کی وجہ سے مختلف اقسام بالخصوص انفیکشن سے پیدا ہونے والی بیماریوں کے پھیلنے کا زیادہ خدشہ ہوتا ہے۔ اس سلسلہ میں ذیابطیس، بلڈ پریشر، فلو، کھانسی اور دیگر بیماریوں سے بچاؤ کیلئے خصوصی احتیاطی تدابیر اختیار کرکے ان کے منفی اثرات سے بچا جا سکتا ہے۔ بیماریوں سے بچاؤ کیلئے محفوظ اور پینے کے صاف پانی اور تازہ خوراک اور سبزیوں کا استعمال ضروری ہے ۔
گلے کے امراض ٹھنڈے پانی اور کولڈ ڈرنکس کے زیادہ استعمال سے پھیلنے کا اندیشہ ہوتا ہے، اس لئے مشروبات اور ٹھنڈی چیزوں کے استعمال سے گریز کرنا چاہئے جو صحت کے لئے نقصان دہ ثابت ہو سکتے ہیں۔ ماہرین صحت کا کہنا ہے کہ سردیوں میں عام طور پر الرجی اور موسمی بیماریوں کے مسائل بڑھ جاتے ہیں جن کا بنیادی سبب سردیوں کا موسم ہے۔ سرد موسم میں جسم پر بیماری غالب آجاتی ہے ۔ گلے کی خراش، آنکھوں اور گلے میں درد وغیرہ کی علامات قابل ذکر ہیں۔ ماہرین کا کہنا ہے کہ سردیوں میں بارش میں نکلنے سے اجتناب کریں۔ سردی کے موسم میں گرم کپڑوں اور ماسک کا استعمال کریں تاکہ اس موسم کی سختی سے بچا جا سکے۔ دمے کے مریضوں کو سردیوں میں خاص احتیاط کرنے کی ضرورت ہوتی ہے۔
