بیجنگ (نیوز ڈیسک)چین کی جدیدکاری کی بنیاد تکنیکی جدیدیت میں مضمر ہے۔ 15ویں پانچ سالہ منصوبے کے پہلے سال میں، کمیونسٹ پارٹی آف چائنا کی مرکزی کمیٹی کے سیاسی بیورو کے پہلے اجتماعی مطالعاتی اجلاس میں مستقبل کی صنعتوں کی منصوبہ بندی اور ترقی پر خصوصی توجہ دی گئی۔مطالعاتی اجلاس کی صدارت کرتے ہوئے جنرل سیکرٹری شی جن پھنگ نے زور دیا کہ معروضی حالات اور تقابلی برتریوں سے بھرپور فائدہ اٹھاتے ہوئے، استحکام کے ساتھ ترقی کے اصولوں پر قائم رہنا چاہیے تاکہ مستقبل کی صنعتوں کی ترقی میں مسلسل نئی پیش رفت حاصل کی جا سکے۔
بیجنگ کے ای زوانگ علاقے میں واقع نیشنل انفارمیشن ٹیکنالوجی انوویشن پارک کے دورے کے دوران،شی جن پھنگ نے انفارمیشن ٹیکنالوجی کے اختراعی اطلاق کے بارے میں تفصیلی بریفنگ لی اور مصنوعی ذہانت، روبوٹکس اور دیگر جدید سائنسی و تکنیکی کامیابیوں کا جائزہ لیا۔ اس کے دو ماہ بعد شنگھائی میں بنیادی تحقیق کے فروغ سے متعلق ایک سمپوزیم منعقد ہوا۔ بیجنگ کے عظیم عوامی ہال میں قومی سائنس و ٹیکنالوجی ایوارڈز کانفرنس منعقد ہوئی، جو کہ 15ویں پانچ سالہ منصوبے کے پہلے سال کی ایک اہم سائنسی تقریب تھی۔ کانفرنس سے خطاب کرتے ہوئے شی جن پھنگ نے واضح کیا کہ “15ویں پانچ سالہ منصوبے” کی مدت کے دوران سائنس و ٹیکنالوجی کے مختلف منصوبوں پر مؤثر انداز میں عمل درآمد کو یقینی بنایا جائے۔
مصنوعی ذہانت کی قیادت میں سائنسی و تکنیکی انقلاب اور صنعتی تبدیلی کا ایک نیا دور شروع ہو چکا ہے۔ ایسے میں ترقی کے مواقع سے فائدہ اٹھانے کے ساتھ ساتھ ممکنہ خطرات سے نمٹنے کے لیے حکمرانی کے نظام کو کیسے مضبوط بنایا جائے، یہ ایک اہم سوال ہے۔ 17 جولائی کو عالمی مصنوعی ذہانت کانفرنس 2026 اور مصنوعی ذہانت کی عالمی حکمرانی پر اعلیٰ سطحی اجلاس شنگھائی میں منعقد ہوا، جہاں شی جن پھنگ نے افتتاحی تقریب سے خطاب کرتے ہوئے مصنوعی ذہانت کی عالمی ترقی اور حکمرانی کے حوالے سے چین کے مؤقف کی وضاحت کی۔ انہوں نے کہا کہ “چین کا ماننا ہے کہ تمام ممالک کو مصنوعی ذہانت کو مشترکہ خوشحالی کے فروغ اور مشترکہ سلامتی کے تحفظ کے لیے ایک اہم محرک بنانا چاہیے۔
چین نے صرف تجاویز پیش کرنے پر اکتفا نہیں کیا بلکہ عملی اقدامات بھی کیے ہیں۔ تمام متعلقہ فریقوں کی مشترکہ کوششوں سے عالمی مصنوعی ذہانت تعاون تنظیم کا باضابطہ قیام شنگھائی میں عمل میں آیا، جو مصنوعی ذہانت کی ترقی کی تاریخ میں ایک اہم سنگ میل ہے۔ 2035 تک سائنس و ٹیکنالوجی کے میدان میں ایک مضبوط ملک بننے کے ہدف کے تحت چین سائنسی و تکنیکی جدت کے ذریعے جدیدکاری کے عمل کو مزید تقویت دیتا رہے گا اور اعلیٰ معیار کی ترقی کی رہنمائی کرے گا۔
