پشاور (عکس آن لائن)پاکستان تحریک انصاف پارلیمنٹرین کے سربراہ پرویز خٹک نے دعویٰ کیا ہے کہ سابق چیئرمین پی ٹی آئی ملک میں الیکشن نہیں صدارتی نظام چاہتے ہیں۔ ایک انٹرویومیں پرویز خٹک نے کہا کہ پہلے بھی پارٹی میں چار پانچ الیکشن جعلی تھے، صرف کاغذی کارروائی تھی، پارٹی میں جمہوریت ہونی چاہیے، فراڈ الیکشن نہیں ہونے چاہئیں۔
انہوں نے کہا کہ ہم حلف اٹھاتے ہیں تو عہد کرتے ہیں کوئی راز فاش نہیں کرنا، سائفر لہرا کر سابق چیئرمین نے غداری اور آئین کی خلاف ورزی کی، ان پر سائفر کیس میں دہشت گردی کا مقدمہ درج کرنا چاہیے۔پرویز خٹک نے کہا کہ جب ان کی حکومت ختم ہوئی تو ہمارے پاس اکثریت نہیں تھی، انہوں نے سوچا کہ ملک کو نہیں چلنے دوں گا، سابق چیئرمین پی ٹی آئی کا خیال تھا ملک میں انتشار پھیلائوں گا، ڈیڑھ سال تک انتشار پھیلاتا رہا، جس سے ملکی معیشت پرا ثر ہوا۔
پی ٹی آئی پارلیمنٹرین کے سربراہ نے کہا کہ آرمی تنصیبات پر حملوں کے لیے الگ ٹیم بنائی گئی تھی اور اسمبلی توڑنے کے حق میں کوئی سیاست دان نہیں تھا۔انہوںنے کہاکہ سابق چیئرمین پی ٹی آئی کو سمجھایا کہ صوبائی اسمبلی نہ توڑی جائے، وہ اپنے آگے کسی کو برداشت نہیں کرتے تھے۔
٭٭٭٭
