بیجنگ (نیوز ڈیسک) چین کے وزیر خارجہ وانگ ای نے ایران کے وزیر خارجہ عباس عراقچی سے ٹیلیفون پر گفتگو کی۔جمعرات کے روز عباس عراقچی نے ایران اور امریکہ کے درمیان پہلے مرحلے کی مفاہمتی یادداشت کے حوالے سے بریفنگ دیتے ہوئے مذاکرات کو آگے بڑھانے اور فریقین کو معاہدے تک پہنچانے میں چین کے فعال کردار پر شکریہ ادا کیا ۔
وانگ ای نے کہا کہ چین، ایران اور امریکہ کے درمیان پہلے مرحلے کی مفاہمتی یادداشت طےپائے جانے کا خیر مقدم کرتا ہے۔انہوں نے کہا کہ ایک جامع اسٹریٹجک شراکت دار کے طور پر چین ہمیشہ ایران کے جائز حقوق اور مفادات کی حمایت کرتا رہا ہے۔ایران کی خودمختاری، سلامتی اور قومی وقار کے تحفظ کی کو ششوں کی تائید کرتا ہے، اور پاکستان سمیت بین الاقوامی برادری کی مصالحتی کاوشوں کی حمایت کرتا ہے۔ چین اپنے طریقہ کار کے مطابق جنگ کے خاتمے اور امن کے فروغ کے لیے تعمیری کردار ادا کرتا رہے گا۔
چین کے وزیر خارجہ نے کہا کہ اگلے مرحلے میں تمام فریق، اپنے وعدوں کو حقیقی طور پر عملی جامہ پہنائیں اور ہر قسم کی مداخلت کو ختم کریں۔ آبنائے ہرمز میں بحری آمد و رفت کے مسئلے کو مناسب طریقے سے حل ہونا چاہیے اور عالمی برادری کی تشویش کا موثر جواب دیا جانا چاہیے۔ انہوں نے کہا کہ چین ایران کی اس کوشش کی بھی حمایت کرتا ہے کہ وہ علاقائی ممالک کے ساتھ تعلقات کو مزید بہتر بنائے اور خطے کی سلامتی کے لیے مشترکہ فریم ورک بنانے میں مثبت کردار ادا کرے۔
