بیجنگ (نیوز ڈیسک) چینی وزیر خارجہ وانگ ای نے بیجنگ میں کیوبا کی پارٹی اور حکومت کے خصوصی ایلچی، کمیونسٹ پارٹی آف کیوبا کی مرکزی کمیٹی کے سیاسی بیورو کے رکن اور کیوبن وزیر خارجہ برونو روڈریگیز سے ملاقات کی۔
وانگ ای نے روڈریگیز سے کہا کہ وہ صدر شی جن پھنگ کی جانب سے کامریڈ راؤل کاسترو اور صدر میگوئل ڈیاز کانیل کے لیے نیک خواہشات پہنچائیں۔ انہوں نے کہا کہ کیوبا نے آزادانہ طور پر اپنے راستے کا انتخاب کرتے ہوئے قومی وقار کا دفاع کیا ہے اور اپنے قومی حالات کے مطابق سوشلسٹ ترقی کی راہ تلاش کرنے کی کوشش کی ہے۔ کیوبا نے طاقت کے سامنے نہ جھکنے والے قومی جذبے کا مظاہرہ کیا ہے، جسے عالمی برادری میں وسیع احترام حاصل ہوا ہے۔
دنیا اس وقت ایک صدی میں رونما ہونے والی غیر معمولی تبدیلیوں سے گزر رہی ہے، تاہم حالات جیسے بھی ہوں، چین کیوبا کی قومی خودمختاری اور جائز حقوق و مفادات کے تحفظ، پابندیوں اور ناکہ بندی کی مخالفت اور بیرونی مداخلت کے خلاف اس کی جدوجہد کی مضبوط حمایت جاری رکھے گا۔
روڈریگیز نے راؤل کاسترو اور صدر میگوئل ڈیاز کانیل کی جانب سے صدر شی جن پھنگ کے لیے دلی نیک خواہشات پہنچائیں۔ انہوں نے کہا کہ چین۔کیوبا تعلقات تزویراتی اہمیت کے حامل ہیں اور ہمیشہ اعلیٰ سطح پر برقرار رہے ہیں۔ چین ہمیشہ کیوبا کی سوشلسٹ تعمیر کا ایک اچھا شراکت دار رہا ہے اور کیوبا دونوں ممالک کے عوام کے مفاد میں دوطرفہ تعلقات کی ترقی کی راہ تلاش کرنے کے لیے چین کے ساتھ مل کر کام کرنے کا خواہاں ہے۔
کیوبا نے قومی ترقی میں چین کی جانب سے فراہم کی جانے والی قیمتی حمایت پر شکریہ ادا کیا۔ کیوبا ایک چین کے اصول کی ہمیشہ مضبوطی سے پابندی کرتا ہے اور چین کے داخلی امور میں کسی بھی بیرونی قوت کی مداخلت کی مخالفت کرتا ہے۔
