بیجنگ (نیوز ڈیسک) چین کے صدر شی جن پھنگ اور پاکستان کے صدر آصف علی زرداری نے چین اور پاکستان کے درمیان سفارتی تعلقات کے قیام کی 75ویں سالگرہ کے موقع پر تہنیتی پیغامات کا تبادلہ کیا۔
شی جن پھنگ نے اپنے پیغام میں کہا کہ چین اور پاکستان ہم نصیب اچھے دوست اور ہمہ موسمی اسٹریٹجک شراکت دار ہیں۔ سفارتی تعلقات کے قیام کے بعد گزشتہ 75 برسوں میں بین الاقوامی صورتحال میں کتنی ہی تبدیلیاں کیوں نہ آئیں، چین۔پاکستان دوستی ہمیشہ چٹان کی مانند مضبوط اور ناقابلِ شکست رہی ہے۔
شی جن پھنگ نے کہا کہ دونوں ممالک نے طویل عرصے سے اعلیٰ سطح کے سیاسی اعتماد، عملی تعاون، سکیورٹی تعاون اور بین الاقوامی اشتراک کو برقرار رکھا ہے، جس نے دوطرفہ تعلقات کی ایک مثال قائم کی ہے۔
انہوں نے زور دیا کہ وہ چین۔پاکستان تعلقات کی ترقی کو انتہائی اہمیت دیتے ہیں اور صدر زرداری کے ساتھ مل کر 75ویں سالگرہ کو ایک نئے نقطہ آغاز کے طور پر لیتے ہوئے اسٹریٹجک روابط مضبوط بنانے، روایتی دوستی کو آگے بڑھانے، ہمہ جہتی تعاون کو گہرا کرنے اور نئے دور میں مزید مضبوط چین۔پاکستان ہم نصیب معاشرے کی تعمیر کو تیز کرنے کے خواہاں ہیں، تاکہ دونوں ممالک کے عوام کو مزید فوائد پہنچائے جا سکیں اور علاقائی امن و ترقی میں کردار ادا کیا جا سکے۔
صدر آصف علی زرداری نے اپنے پیغام میں کہا کہ پاکستان اور چین کے درمیان ہمہ موسمی اسٹریٹجک تعاون کی شراکت داری وقت کے ساتھ مزید مضبوط ہوئی ہے اور یہ علاقائی امن، استحکام اور ترقی کا ایک مضبوط ستون بن چکی ہے۔
انہوں نے شی جن پھنگ کی جانب سے پیش کردہ گلوبل انیشی ایٹوز کو دور رس اہمیت کا حامل قرار دیتے ہوئے کہا کہ پاکستان چین کے ساتھ تعلقات کو مزید گہرا کرنے اور نئے دور میں مزید مضبوط پاکستان۔چین ہم نصیب معاشرے کی تعمیر کے لیے چینی قیادت کے عزم کو قدر کی نگاہ سے دیکھتا ہے۔
صدر زرداری نے کہا کہ پاکستان اپنی خودمختاری اور علاقائی سالمیت کے تحفظ اور اقتصادی و سماجی ترقی کے لیے چین کی مستقل حمایت پر دل سے شکر گزار ہے، جبکہ پاکستان بھی چین کے بنیادی مفادات سے متعلق امور میں بدستور چین کی حمایت جاری رکھے گا اور دونوں ممالک کی دوستی کو نئی بلندی تک پہنچائے گا۔
اسی روز چین کے وزیرِ اعظم لی چھیانگ اور پاکستان کے وزیرِ اعظم شہباز شریف کے درمیان بھی تہنیتی پیغامات کا تبادلہ ہوا۔
لی چھیانگ نے کہا کہ چین پاکستان کے ساتھ اتحاد اور تعاون کو مزید مضبوط بنانے اور چین۔پاکستان اقتصادی راہداری کے ” اپ گریڈ ورژن” کی تعمیر کو فعال انداز میں آگے بڑھانے کا خواہاں ہے، تاکہ دونوں ممالک کی ہمہ موسمی اسٹریٹجک شراکت داری کو مزید فروغ دیا جا سکے۔
شہباز شریف نے اپنے پیغام میں کہا کہ پاکستان۔چین تعلقات باہمی اعتماد، خودمختاری کے احترام اور امن و ترقی کے مشترکہ وژن پر مبنی ہیں۔ انہوں نے کہا کہ پاکستان اعلیٰ معیار کی حامل سی پیک کی تعمیر کے لیے پُرعزم ہے اور دونوں ممالک کے درمیان تعاون کے نئے شعبوں کی جستجو کرتا رہے گا۔
