بیجنگ (نیوز ڈیسک) چینی صدر شی جن پھنگ نے شنگھائی کے شی جیاؤ ہوٹل میں تھائی لینڈ کے وزیر اعظم انوتن چارنویراکول سے ملاقات کی۔
تھائی وزیر اعظم عالمی مصنوعی ذہانت کانفرنس 2026 اور مصنوعی ذہانت کی عالمی حکمرانی سے متعلق اعلیٰ سطحی اجلاس میں شرکت اور سرکاری دورے کے لیے چین آئے ہیں۔جمعہ کے روز شی جن پھنگ نے کہا کہ چین تھائی لینڈ کی اپنی قومی صورتحال کے مطابق ترقی کی راہ پر گامزن ہونے کی بھرپور حمایت کرتا ہے اور نئی تھائی حکومت کی ملک میں ہموار حکمرانی کے لیے بھی حمایت جاری رکھے گا۔ چین بین الاقوامی اور علاقائی امور میں تھائی لینڈ کے مزید فعال کردار کا بھی خیرمقدم کرتا ہے۔
انہوں نے کہا کہ تھائی لینڈ اور کمبوڈیا کے درمیان سرحدی تنازع کو مناسب طریقے سے حل کرنا دونوں ممالک کے عوام کے مشترکہ اور طویل مدتی مفادات میں ہے۔ صدر شی جن پھنگ نےاس امید کا اظہار کیا کہ دونوں فریق تنازعات کو پرامن طریقے سے حل کرنے کے لیے بات چیت اور مشاورت کا راستہ اختیار کریں گے اور چین اس سلسلے میں تعمیری کردار ادا کرتا رہے گا۔
تھائی لینڈ کے وزیر اعظم انوتن چارنویراکول نے کہا کہ چین ہمیشہ تھائی لینڈ کا قابل اعتماد دوست رہا ہے اور تھائی لینڈ پختہ عزم کے ساتھ ایک چین کے اصول پر عمل پیرا ہے۔ تھائی لینڈ چین کے ساتھ اپنے تعلقات کو مزید گہرا کرنے کے لیے پرعزم ہے تاکہ دونوں ممالک کے درمیان جامع تزویراتی تعاون پر مبنی شراکت داری کو فروغ دیا جا سکے اور دونوں ممالک کے عوام کو مزید فوائد پہنچائے جا سکیں۔ انہوں نے کہا کہ وہ تھائی لینڈ اور کمبوڈیا کے درمیان تنازع کو پرامن طریقے سے حل کرنے کے لیے پرعزم ہیں اور اس سلسلے میں چین کے منصفانہ کردار کو سراہتے ہیں۔
