بیجنگ (نیوز ڈیسک) چینی وزیرِ خارجہ وانگ ای نے نیویارک میں اقوام متحدہ کے ہیڈکوارٹرز میں منعقدہ “گلوبل گورننس فرینڈز گروپ” کے اجلاس میں شرکت کی۔اجلاس میں پاکستان، ترکمانستان، کرغزستان، کیوبا اور زمبابوے کے وزرائے خارجہ سمیت 60 سے زائد ممالک کے نمائندوں نے شرکت کی۔
جمعہ کے روز وانگ ای نے اپنے کلیدی خطاب میں کہا کہ صدر شی جن پھنگ نے گزشتہ سال ستمبر میں باضابطہ طور پر گلوبل گورننس انیشی ایٹو پیش کیا تھا، جسے اب تک تقریباً 160 ممالک اور بین الاقوامی تنظیموں کی حمایت حاصل ہو چکی ہے۔انہوں نے کہا کہ “گلوبل گورننس فرینڈز گروپ” نیویارک، جنیوا اور ویانا میں قائم کیا جا چکا ہے اور اس کے رکن ممالک کی تعداد 60 سے تجاوز کر گئی ہے۔وانگ ای نے اعلان کیا کہ چین رواں سال موسمِ خزاں میں شیونگ آن میں “شیونگ آن گلوبل گورننس فورم” کا انعقاد کرے گا۔
اجلاس کے اختتام پر “گلوبل گورننس فرینڈز گروپ” کا مشترکہ اعلامیہ بھی جاری کیا گیا۔ نیویارک میں قیام کے دوران وانگ ای نے کرغزستان، تھائی لینڈ، کولمبیا، ارجنٹینا، جمہوریہ چیک، آذربائیجان، کوسٹا ریکا، سربیا، کمبوڈیا، ٹرینیڈاڈ اور ٹوباگو، ترکمانستان، کیوبا، پرتگال، پاکستان، یوراگوئے اور پاناما کے وزرائے خارجہ سے الگ الگ ملاقاتیں بھی کیں۔اس کے علاوہ انہوں نے امریکی اسٹریٹجک اور کاروباری حلقوں کی شخصیات کے ساتھ ایک خصوصی نشست میں بھی شرکت کی۔
