بیجنگ (نیوز ڈیسک)سربراہی اعلامیے کی منظوری، ” اپیک لیڈرز شین زین آؤٹ لک2026 ” پر اتفاق اور تجارت، باہمی روابط اور جدت طرازی کے شعبوں میں تین اہم دستاویزات کا اجراء۔ شین زین میں منعقدہ اپیک اکنامک لیڈرز میٹنگ میں حاصل شدہ ان سلسلہ وار نتائج نے ایشیا پیسیفک اقتصادی تعاون کو نئی بلندی تک پہنچا دیا ہے۔ تمام فریقوں کا خیال ہے کہ صدر شی جن پھنگ کی رہنمائی میں تمام اپیک معیشتوں کے رہنماؤں نے ایشیا پیسیفک کمیونٹی کی تعمیر کا روڈ میپ تیار کیا اور اس کے چار ستونوں کی تعمیر کے ذریعے ایشیا پیسیفک معجزے کا نیا باب رقم کرنے کی سمت متعین کی۔
اجلاس کے دوران چین نے ایشیا پیسیفک تعاون کی حمایت کے لیے نئے اقدامات کا اعلان کیا۔ ان میں اپیک کے عملی تعاون کے لیے مالی معاونت فراہم کرنا، شین زین میں ایشیا پیسیفک کمیونٹی ریسرچ سینٹر کا قیام، اور ڈیجیٹل ٹیکنالوجی، سرحد پار ڈیٹا کے بہاؤ، صاف توانائی اور چھوٹے و درمیانے درجے کے کاروباری اداروں کی ترقی جیسے شعبوں میں تعاون کے اداروں کا قیام شامل ہے۔ بین الاقوامی میڈیا کے مطابق، ان اقدامات سے علاقائی انضمام، تکنیکی جدت طرازی اور سبز ترقی کو فروغ دینے کے حوالے سے چین کے عزم کا واضح اظہار ہوتا ہے۔
“اپیک لیڈرز شین زین آؤٹ لک” کی منظوری سے ظاہر ہوتا ہے کہ تمام فریق اختلافات کے باوجود اپیک کے بنیادی مقصد کو برقرار رکھنے اور ایشیا پیسیفک کمیونٹی کی تعمیر کو عملی پیش رفت کے نئے مرحلے میں لے جانے کے لیے پُرعزم ہیں۔ چین تمام رکن معیشتوں کے ساتھ مل کر ایشیا پیسیفک کمیونٹی کی تعمیر کے لیے کوششیں جاری رکھنے کا خواہاں ہے، تاکہ عالمی امن و ترقی میں مزید مثبت کردار ادا کیا جا سکے۔