شی جن پھنگ

چین اور جنوبی کوریا کو دوطرفہ تعلقات کی مستحکم ترقی کو آگے بڑھانا چاہیے، چینی صدر

بیجنگ (نیوز ڈیسک) چینی صدر شی جن پھنگ اور جنوبی کوریا کے صدر لی جے میونگ کے درمیان شین زین میں ملاقات ہوئی، جنوبی کوریا کے صدر اپیک اکنامک لیڈرز میٹنگ میں شرکت کے لیے چین آئے ہوئے ہیں۔

شی جن پھنگ نے نشاندہی کی کہ آئندہ سال چین اور جنوبی کوریا کے درمیان سفارتی تعلقات کے قیام کو 35 سال مکمل ہو جائیں گے۔ دونوں فریقوں کو اس موقع سے فائدہ اٹھاتے ہوئے دوطرفہ تعلقات کی مستحکم ترقی کو آگے بڑھانا چاہیے۔ انہوں نے کہا کہ چین اور جنوبی کوریا نے آزاد تجارتی معاہدے کے دوسرے مرحلے کے مذاکرات بنیادی طور پر مکمل کر لیے ہیں، جو باہمی فائدے اور مشترکہ کامیابی کے امکانات کو مزید مضبوط بنانے میں مددگار ثابت ہوں گے۔

شی جن پھنگ نے زور دیا کہ دونوں فریقوں کو کثیرالجہتی تعاون کو مزید بڑھانا چاہیے، حقیقی کثیرالجہتی اقدامات پر مشترکہ طور پر عمل کرنا چاہیے اور ایشیا پیسیفک کمیونٹی اور ایشیا پیسیفک آزاد تجارتی علاقے کی تعمیر کو آگے بڑھانا چاہیے، تاکہ خطے میں امن و ترقی کے لیے مزید خدمات انجام دینے، عالمی صنعتی و سپلائی چین کے استحکام اور روانی کا تحفظ کیا جا سکے اور زیادہ منصفانہ و معقول عالمی نظامِ حکمرانی کی تشکیل کو فروغ دیا جاسکے۔

صدر لی جے میونگ نے کہا کہ صدر شی جن پھنگ اور ان کی اسٹریٹجک رہنمائی میں جنوبی کوریا اور چین کے تعلقات کی جامع بحالی کا رجحان مسلسل برقرار ہے۔ جنوبی کوریا کی ایک چین کی پالیسی پر ثابت قدمی میں نہ پہلے کوئی تبدیلی آئی ہے اور نہ آئندہ آئے گی۔انہوں نے کہا کہ جنوبی کوریا چین کے ساتھ مل کر مزید مستحکم اسٹریٹجک شراکت داری اور مشترکہ خوشحالی پر مبنی ایشیا پیسیفک کمیونٹی کی تعمیر کے لیے تیار ہے۔