لاہور 14 نومبر(زاہد انجم سے)پرنسپل پوسٹ گریجویٹ میڈیکل انسٹی ٹیوٹ پروفیسر فاروق افضل نے کہا کہ ذیابیطس بعض اوقات وراثتی طور پر بھی منتقل ہوتی ہے، بالکل جیسے جائیداد نسل در نسل آگے بڑھتی ہے۔ ایسے خاندانوں کے افراد کو خاص طور پر اپنی خوراک، ورزش اور باقاعدہ چیک اپ پر توجہ دینی چاہیے تاکہ وہ بروقت تشخیص اور احتیاط کے ذریعے بیماری کے خطرات سے بچ سکیں۔ ان خیالات کا اظہار انہوں نے عالمی یومِ ذیابیطس کے موقع پر لاہور جنرل ہسپتال میں آگاہی واک کے شرکاء اور میڈیا سے گفتگو میں کیا۔ جبکہ ہسپتال انتظامیہ کی جانب سے فری میڈیکل کیمپ بھی لگایا گیا، جہاں آنے والے افراد کا بلا معاوضہ بلڈ شوگر ٹیسٹ کیا گیا۔

پروفیسر فاروق افضل نے عوامی شعور بڑھانے کے لیے خود بھی بلڈ شوگر ٹیسٹ کرایا۔ایم ایس پروفیسر ڈاکٹر فریاد حسین، پروفیسر خرم سلیم، پروفیسر شندانہ طارق، ڈاکٹر عزیز فاطمہ، ڈاکٹر محمد مقصود، ڈاکٹر جعفر حسین،ڈاکٹر عمر اعجاز، ڈاکٹر عبدالعزیز، ڈاکٹر احسان الحق،ڈاکٹر عمارہ اختر، ڈاکٹر فائزہ، ڈاکٹر انعم بتول اور نرسنگ سپریٹنڈنٹ صائمہ فتح سمیت نرسز و ہیلتھ پروفیشنلز بھی اس موقع پر موجود تھے۔
پروفیسر خرم سلیم کے مطابق عالمی یومِ ذیابیطس منانے کا مقصد عوام میں صحت کے حوالے سے شعور اجاگر کرنا اور ذیابیطس کے بڑھتے ہوئے خطرات سے آگاہ کرنا ہے، جبکہ ڈاکٹر محمد مقصود نے اس بیماری سے ہونے والی پیچیدگیوں اور بچاؤ پر تفصیلی روشنی ڈالی۔شرکا نے ذیابیطس سے بچاؤ اور صحت مند طرزِ زندگی کے فروغ کے لیے آگاہی بینرز اٹھائے۔ بعد ازاں پروفیسر فاروق افضل نے ہسپتال میں موجود مریضوں اور ان کے لواحقین میں ذیابیطس سے بروقت تشخیص اور احتیاط کی اہمیت پر پمفلٹس بھی تقسیم کیے۔