لاہور، 10 نومبر(زاہد انجم سے)پرنسپل امیرالدین میڈیکل کالج پروفیسر ڈاکٹر فاروق افضل نے کہا کہ ریڈیالوجی کے بغیر جدید طبی سہولیات کا تصور ممکن نہیں، جدید طبی دنیا میں ریڈیالوجی کی اہمیت کلیدی حیثیت رکھتی ہے جبکہ ریڈیالوجی تشخیص کا وہ طریقہ ہے جس میں بغیر کسی کٹ کے، آنکھ سے جسم کے اندر تک دیکھا جا سکتا ہے اور بیماری کی بروقت تشخیص ممکن ہو جاتی ہے۔انہوں نے یہ بات عالمی یوم ریڈیالوجی کی مناسبت سے لاہور جنرل ہسپتال میں منعقدہ آگاہی واک / تقریب سے خطاب کر تے ہوئے کہی۔ تقریب میں ایم ایس پروفیسر فریاد حسین، پروفیسر آف ریڈیالوجی ڈاکٹر نگہت ہارون، ڈاکٹر نادیہ حنیف، ڈاکٹر سدرہ سیال، ڈاکٹر فاطمہ اقبال، ڈاکٹرنادیہ ارشاد، ڈاکٹر علی منصور سمیت ڈاکٹرز، سٹوڈنٹس، نرسز کی بڑی تعداد نے شرکت کی۔

پروفیسر ڈاکٹر فاروق افضل نے کہا کہ ریڈیالوجی ڈیپارٹمنٹ میں نوجوان ڈاکٹرز کی تعلیم، تربیت اور ریسرچ کے مواقع کو مزید فروغ دیا جا رہا ہے تاکہ وہ جدید طبی ٹیکنالوجی کے استعمال میں مہارت حاصل کر سکیں اور عالمی معیار کے مطابق اپنی پیشہ ورانہ صلاحیتوں کو نکھار سکیں۔انہوں نے کہا کہ آج ایکس رے، سی ٹی اسکین، ایم آر آئی، الٹراساؤنڈ، میموگرافی اور انٹروینشنل ریڈیالوجی جیسے جدید طریقہ تشخیص نے طب کے میدان میں انقلاب برپا کر دیا ہے۔ میموگرافی بریسٹ کینسر کی بروقت تشخیص کے لیے نہایت مؤثر اور محفوظ طریقہ ہے، جو خواتین میں بڑھتے ہوئے اس مرض کے تدارک میں اہم کردار ادا کر رہا ہے۔ان جدید سہولیات کے ذریعے جسم کے اندرونی اعضا کی انتہائی باریک سطح پر جانچ ممکن ہو گئی ہے، جس سے کینسر، دل، دماغ، ہڈیوں اور دیگر پیچیدہ امراض کی جلد تشخیص اور مؤثر علاج ممکن ہو رہا ہے۔ایم ایس ڈاکٹر فریاد حسین نے شعبہ ریڈیالوجی کی کارکردگی پر روشنی ڈالتے ہوئے کہا کہ جنوری تا اکتوبر تک 104457الٹرا ساؤنڈ، 251288ایکسرے، 61091سی ٹی سکین اور 15519مریضوں کے ایم آر آئی کئے گئے۔ انہوں نے کہا کہ پی جی ایم آئی/اے ایم سی کی اولین ترجیح ہے کہ جدید ترین ٹیکنالوجی اور ماہرانہ تربیت کے ذریعے مریضوں کو عالمی معیار کی سہولیات فراہم کی جائیں۔

پروفیسر آف ریڈیالوجی ڈاکٹر نگہت ہارون کا کہنا تھا کہ جنرل ہسپتال کا ریڈیالوجی ڈیپارٹمنٹ نہ صرف مریضوں کو عالمی معیار کی سہولیات فراہم کر رہا ہے بلکہ نوجوان ڈاکٹرز کے لیے عملی تربیت، تحقیقی منصوبوں اور جدید مشینری کے استعمال کے مواقع بھی فراہم کرتا ہے۔ ان کا کہنا تھا کہ ریڈیالوجی مستقبل کی طب کی بنیاد ہے اور اس شعبے میں تحقیق اور ٹیکنالوجی کے امتزاج سے مریضوں کا علاج مزید مؤثر، محفوظ اور کامیاب بنتا جا رہا ہے۔انہوں نے کہا کہ کہ ریڈیالوجی سے پوری دنیا میں لوگ مستفید ہو رہے ہیں ضرورت اس امر کی ہے کہ نوجوان ڈاکٹرز اپنی پیشہ ورانہ مہارت اور ریسرچ پر مرکوز کریں۔ تقریب کے اختتام پر پرنسپل پروفیسر فاروق افضل نے ہسپتال انتظامیہ اور ریڈیالوجی سے وابستہ ڈاکٹرز کے ہمراہ کیک کاٹا اور اس عزم کا اظہار کیا ایل جی ایچ ریڈیالوجی کے شعبے میں جدت اور معیار کو برقرار رکھیں گے۔
٭٭٭٭