اسلام آ باد (نمائندہ عکس ) وزیر اعظم شہباز شریف نے تجارت، سرمایہ کاری، توانائی، انفراسٹرکچر، فوڈ سیکورٹی اور روزگار کے مواقع بڑھانے پر توجہ مرکوز کرتے ہوئے متحدہ عرب امارات کے ساتھ تعلقات کی اقتصادی جہت کو مزید آگے بڑھانے کے حکومتی عزم پر زور دیا ہے۔
تفصیلات کے مطابق وزیراعظم شہباز شریف کی متحدہ عرب امارات کے سفیر سے ملاقات ہوئی جس دوران قتصادی تعلقات کو مزید آگے بڑھانے کے عزم پر زور دیا گیا ہے۔ اسلام آباد میں متحدہ عرب امارات کے سفیر حماد عبید ابراہیم سالم الزابی سے گفتگو کرتے ہوئے، انہوں نے اہم شراکت داری کو مزید گہرا اور وسیع کرنے کے لیے متحدہ عرب امارات کی قیادت کے ساتھ قریبی رابطے کے عزم کا اظہار کیا۔ وزیراعظم نے اس بات کی تصدیق کی کہ پاکستان اور متحدہ عرب امارات کے درمیان ہمیشہ خصوصی تعلقات رہے ہیں جو مشترکہ تاریخ، مشترکہ عقیدے اور جغرافیائی قربت میں مضبوطی سے جڑے ہوئے ہیں۔ انہوں نے اس بات پر زور دیا کہ ان تعلقات کو قریبی لوگوں سے لوگوں کے رابطوں سے مزید تقویت ملتی ہے۔
شہباز شریف نے متحدہ عرب امارات کی ترقی میں تارکین وطن پاکستانیوں کے اہم کردار کا اعتراف کیا جو دونوں ممالک کے درمیان مضبوط پل کا کردار ادا کر رہے ہیں۔ وزیراعظم نے صرف پچاس سال کے عرصے میں ملک کی متاثر کن تبدیلی کے لیے متحدہ عرب امارات کی قیادت کے وژن کی بھی تعریف کی۔ شہباز شریف کو وزارت عظمی کا عہدہ سنبھالنے پر مبارکباد پیش کرتے ہوئے متحدہ عرب امارات کے سفیر نے پاکستان کے ساتھ دوطرفہ تعلقات کو مزید مضبوط بنانے کی اپنے ملک کی خواہش کا اعادہ کیا۔
