کراچی(عکس آن لائن) شہر قائد میں اینکر مرید عباس کے قتل کیس میں مصروف تفتیشی سب انسپکٹر پر فائرنگ کے نتیجے میں شدید زخمی حالت میں اسپتال منتقل کردیا گیا۔تفصیلات کے مطابق صوبہ سندھ کے دارالحکومت کراچی میں بریگیڈ تھانے کی حدود میں کار پر فائرنگ ہوئی جس کے نتیجے میں سب انسپکٹر غوث عالم شدید زخمی ہوگئے۔زخمی سب انسپکٹر کو جناح اسپتال منتقل کر دیا گیا ہے۔
جناح اسپتال کی ڈائریکٹر ڈاکٹر سیمی جمالی کا کہنا ہے کہ زخمی سب انسپکٹر کی حالت انتہائی تشویشناک ہے، زخمی پولیس افسر کو چہرے پر ایک گولی لگی ہے۔ایس ایس پی انویسٹی گیشن کا کہنا ہے کہ غوث عالم انویسٹی گیشن ساتھ زون میں تعینات ہیں۔ آج صبح 2 موٹر سائیکلوں پر سوار چار ملزمان نے ان پر حملہ کیا۔ غوث عالم کی گاڑی سگنل پر رکی تو ملزمان نے فائر کیا۔ان کے مطابق ملزمان نے سر پر ایک ہی گولی چلائی، گولی سب انسپکٹر کے جبڑے پر لگی۔ فائرنگ کے بعد گاڑی آگے جا کر رکشے سے ٹکرا کر رکی۔
پولیس کا کہنا ہے کہ زخمی سب انسپکٹر غوث عالم ہائی پروفائل کیس میں مصروف تفتیش تھے، غوث عالم نے اینکر مرید عباس قتل کیس کے انتہائی مطلوب ملزم کو گرفتار کیا۔ غوث عالم نے 3 گھنٹے پہلے ملزم عادل زمان کو تھانے منتقل کیا، تھانے سے دفتری امور کے لیے نکلا تو 4 ملزمان نے فائرنگ کردی۔پولیس کے مطابق زخمی سب انسپکٹر غوث عالم کا کراچی آپریشن میں بھی اہم کردار ہے، غوث عالم دیگر انتہائی اہم مقدمات پر کام کر رہے تھے۔
