لاہور( نمائندہ عکس)پاکستان میٹرولوجیکل ڈیپارٹمنٹ نے ملک میں ڈینگی وائرس پھیلنے کے خطرے کے پیش نظر الرٹ جاری کردیا جس میں ملک کے 10 شہروں میں ڈینگی کی وبا ء پھیلنے کا خطرہ ظاہر کیا گیا ہے ۔پاکستان میٹرولوجیکل ڈیپارٹمنٹ کے مطابق بارشوں اور سیلابی صورتحال کے بعد گرم موسم کے پیش نظر ملک میں ڈینگی وائرس الرٹ جاری کیا گیا ہے ۔ملک کے 10 شہروں کراچی، لاہور، پشاور، راولپنڈی، اسلام آباد، حیدر آباد، فیصل آباد، سیالکوٹ، لاڑکانہ اور ملتان میں ڈینگی وائرس کے بڑھتے کیسز کے سبب الرٹ جاری کیا گیا ہے۔میٹرولوجیکل ڈیپارٹمنٹ نے ملک کے 10 شہروں اور سیلاب متاثرہ علاقوں میں انتظامیہ کو الرٹ رہنے اور حفاظتی انتظامات کرنے کی ہدایات جاری کی ہیں۔جاری الرٹ میں مزید کہا گیا ہے ملک میں ڈینگی بخار نے اپنی جڑیں مضبوط کرلی ہیں،
ڈینگی نے گزشتہ 10 برس میں لوگوں کی صحت کو شدید متاثر کیا ہے، یہ مرض خاص طور پر مون سون کے بعد کے موسم 20 ستمبر سے 5 دسمبرکے دوران زیادہ پھیلتا ہے، یہ موسم اس مرض کیلئے سازگار ہوتا ہے۔ڈینگی ان ادوار کے دوران شروع ہوتا ہے جہاں درجہ حرارت اور نمی 26 سے 29 سینٹی گریڈ تک 3 سے 5 ہفتے تک رہے اور ان ایام میں بالترتیب 60 فیصد درجہ حرارت یہی رہتا ہے۔جہاں تین ہفتوں تک 27 ملی میٹر بارش ہوئی ہے وہاں ڈینگی پھیلنے کے امکانات زیادہ ہیں، ڈینگی مچھر طلوع آفتاب اور غروب افتاب کے وقت کاٹتا ہے، موجودہ اور مستقبل کے آب و ہوا کے لحاظ سے ماحولیاتی تغیرات ڈینگی کے پھیلنے کیلئے ایک مثالی ماحول فراہم کررہے ہیں۔ستمبر 2022 سے ڈینگی کے آغاز کیلئے موحول سازگار ہوگیا اور اکتوبر کے مہینے میں ڈینگی وائرس کے پھیلا ئومیں شدت آسکتی ہے۔
