لندن (نمائندہ عکس) وزیر اعظم شہباز شریف نے کہا ہے کہ عالمی رہنماوں نے پاکستان کی مدد کا یقین دلایا ہے، اقوام متحدہ کے سیکرٹری جنرل سیلاب زدگان کی بحالی کے لیے ڈونرز کانفرنس منعقد کرائیں گے، عالمی برادری اور پاکستانی اداروں کی کوششوں سے ہم انشا اللہ اس مشکل سے نکل آئیں گے۔وزیر اعظم شہباز شریف کی زیر صدارت سیلاب زدہ علاقوں میں امدادی کاموں کے حوالے سے اجلاس ہوا۔
جس میں وزیر اعظم نے لندن سے بذریعہ ویڈیو لنک اجلاس میں شرکت کی اور بحالی کے کاموں کا جائزہ لیا۔ وزیر اعظم شہباز شریف نے کہا کہ اقوام متحدہ کے سیکرٹری جنرل انتونیو گوتریس سمیت اہم لیڈر شپ سے ملاقاتیں ہوئیں جنہیں حکومت کی امدادی کارروائیوں اور بحالی کی کوششوں کے بارے میں آگاہ کیا۔ وزیر اعظم نے سعودی ولی عہد محمد بن سلمان سے ٹیلیفونک گفتگو کا بھی ذکر کرتے ہوئے کہا کہ عالمی رہنماوں کو موسمیاتی تبدیلی کے پاکستان پر اثرات اور پاکستان کے نقطہ نظر سے آگاہ کیا۔
شہباز شریف نے کہا کہ عالمی رہنماوں نے سیلاب سے ہونے والے نقصانات پر ہمدردی اور تعزیت کا اظہار کرتے ہوئے پاکستان کی مدد کا یقین دلایا ہے۔ انہوں نے کہا کہ اقوام متحدہ کے سیکرٹری جنرل سیلاب زدگان کی بحالی کے لیے ڈونرز کانفرنس منعقد کرائیں گے اور بل گیٹس سے متاثرین کے بچوں کی خوراک کے لیے ورلڈ فوڈ پروگرام سے مدد لینے کی بات کی ہے۔ وزیر اعظم نے کہا کہ عالمی برادری اور پاکستانی اداروں کی کوششوں سے ہم انشا اللہ اس مشکل سے نکل آئیں گے۔ نیشنل فلڈ ریسپانس کوآرڈینیشن سینٹر کے حکام نے بحالی کے کاموں کے حوالے سے وزیراعظم کو بریفنگ دی۔
