لاہور( عکس آن لائن)آل پاکستان انجمن تاجران کے مرکزی صدر اشرف بھٹی نے کہا ہے کہ حکومت ٹیکس اصلاحات کمیٹی کا دائرہ وسیع کرے اور اس میں تما م شعبوں سے اسٹیک ہولڈرز کو نمائندگی دی جائے،چھوٹے کاروبار کیلئے ٹیکس کا نظام آسان بنایا جائے، بلا جواز نوٹسز کا خاتمہ ہونا چاہیے ۔ اپنے بیان میں انہوں نے کہا کہ چیئرمین ایف بی آر کے مطابق ریٹیل اور ہول سیل سیکٹر ابھی تک ریٹرنز نہیں دیتے جو قطعی درست نہیں ، تاجروں کی اکثریت باقاعدگی سے اپنے گوشوارے جمع کراتی اور ٹیکسز کی ادائیگی کرتی ہے ۔
ہم متعدد بار پیشکش کر چکے ہیں کہ مارکیٹوں میں سروے کیا جائے ہم ایف بی آر سے تعاون کریں گے ۔ اس کے برعکس ایف بی آر کی جانب سے نوٹسز کی بھرمار ہے جس سے خوف و ہراس کی فضاء فروغ پاتی ہے۔ وزیر خزانہ اسحاق ڈار سے مطالبہ ہے کہ ٹیکسز کی تعداد اور اس کی شرح میں کمی کا تجربہ کریں ، حکومت کی سوچ سے زیادہ ٹیکس آمدن حاصل ہو سکتی ہے ۔ انہوں نے کہا کہ محکمہ ایف بی آر کی بھی اصلاح کی ضرورت ہے ، ادارے کی استعداد بڑھائی جائے اور آٹو میشن کا نظام لایا جائے ۔