کراچی (عکس آن لائن) اوپن مارکیٹ میں ڈالر کو مسلسل اڑان کے بعد جھٹکا لگ گیا۔ 2 روز کے دوران اوپن مارکیٹ میں ڈالر کی قیمت میں 12 روپے کی کمی ہو گئی۔کاروباری ہفتے کے تیسرے روز ڈالر کی قیمت روپے کے مقابلے میں یک دم 7 روپے کم ہو کر 316 روپے کی سطح پر آ گئی، جب کہ گزشتہ روز اوپن کرنسی مارکیٹ میں ڈالر کی قیمت 5 روپے کم ہو کر 323 روپے پر بند ہوئی تھی۔
اس طرح 2 دنوں میں اوپن مارکیٹ میں ڈالر کی قدر 12 روپے کم ہوگئی۔دریں اثنا انٹربینک مارکیٹ میں ڈالر کی قدر 11 پیسے کی کمی سے 306 روپے 97 پیسے کی سطح پر آ گئی، جس کے بعد ڈالر کی قیمت میں اتار چڑھاؤ کا رجحان جاری رہا اور دوپہر تک انٹربینک مارکیٹ میں ڈالر کی قدر 14 پیسے کمی سے 306 روپے 95 پیسے ہو گئی۔