اردو ادب کی معروف شخصیت

اردو ادب کی معروف شخصیت اشفاق احمد کو ہم سے بچھڑے 16 برس بیت گئے۔

شوبز (عکس آن لائن ) اشفاق احمد 22 اگست 1925ء کو غیر منقسم ہندوستان کے ضلع ہوشیارپور کے گاؤں خان پور میں پیدا ہوئے۔ 1947میں قیام پاکستان کے بعد لاہور منتقل ہوگئے۔ افسانہ اورڈرامہ نگاری کے ساتھ فلسفی ، ادیب اور دانشور ہونے کے علاوہ بہترین براڈ کاسٹرتھے۔
اردوادب کی معروف شخصیت اشفاق احمد کو ہم سے بچھڑے 16 برس بیت گئے لیکن اس جہان فانی سے کوچ کرجانے کے اتنے برس بعد ان کی جگہ کوئی نہ لے سکا، جو اپنے قصے، کہانیوں سے علم و حکمت، عقل ودانش اورفکرودانش کے موتی بکھیرسکے۔
گورنمٹ کالج لاہورسے اردو ادب میں ماسٹرز کرنے کے بعد ریڈیو آزاد کشمیر سے منسلک ہوئے۔ روم یونیورسٹی میں اردو کے استاد بھی رہے اور وطن واپسی کے بعد ادبی مجلہ “داستان گو” جاری کیا۔ 60ء کی دہائی میں ایک فیچر فلم ”دھوپ اور سائے” بھی بنائی۔
1953ء میں شائع ہونے والے افسانے ”گڈریا ” نے ان کی شہرت کو چار چاند لگا دیئے۔ اشفاق احمد کی تصانیف میں ’’ایک محبت سو افسانے‘‘ ، ’’اجلے پھول‘‘، ’’سفردرسفر‘‘، ’’کھیل کہانی‘‘، ’’طوطا کہانی‘‘ اور زاویہ جیسے بہترین شاہکار شامل ہیں۔
ریڈیو پاکستان پر ان کے پروگرام ’’تلقین شاہ‘‘ اور پی ٹی وی پر ڈراما سیرئیل ’’ایک محبت سو افسانے‘‘ سے انہیں بے پناہ مقبولیت حاصل ہوئی۔ نوے کی دہائی میں اشفاق احمد نے سماجی و روحانی موضوعات پر گفتگو کا پروگرام’’زاویہ‘‘ شروع کیا جس نے ان کی شہرت کو ایک نئی جہت عطا کی۔

اپنا تبصرہ بھیجیں